“Kam folur me Ranierin, u sqaruam. Rrini të qetë. Ai ka besim total nga ana ime.” Këto janë fjalët e Massimo Morattit për mediat italiane duke sqaruar se Ranieri gëzon besimin e tij të plotë.
“Kam besim total tek Ranieri dhe besimi nuk varet nga ndeshja me Catanian. Skuadra është e habitur për këtë gjendje që po kalon dhe aspak e frikësuar apo e nervozuar. Kemi shpresë se mund të bëjmë mirë”, deklaroi presidenti zikaltër.
“Ranieri është i bindur se mund ta nxjerrë Interin nga kjo gjendje. Interi nuk ishte ekip që mund të fitonte kampionatin, por sigurisht nuk ishte edhe një ekip që mund të humbte gjithë këto ndeshje. Nuk është se ka ndonjë magjistar në qarkullim që mund të përmirësojë shpejt gjendjen tonë”, u shpreh Moratti.
Sërish për Ranierin, presidenti shtoi: “E ardhmja e Ranierit nuk varet vetëm nga një ndeshje, por është shumë e rëndësishme fitorja sepse në këtë moment çdo humbje rëndon shumë për ne.”
