Shkencëtarët janë afër vërtetimit të ekzistencës së një planeti të ri në sistemin tonë Diellor, të quajtur Tyche. Tyche llogaritet të jetë katër herë më i madh se Jupiteri, i cili momentalisht konsiderohet si planeti më i madh i sistemit tonë Diellor.
Astrofizikanët Johne Matese dhe Daniel Whitmire të Universitetit Lafayette të Luizianës janë ata të cilët po flasin për herë të parë për ekzistencën e këtij planeti. Ata besojnë se planeti i ri "fshihet" në renë Oort, e cila krijon mbështjelljen e jashtme të sistemit Diellor, shkruan The Independent.
Tyche, është një planet gjigant i përbërë nga gazra, kryesisht hidrogjen dhe helium, i cili mund të ketë një mase prej 5.300 herë më të madhe se Toka. Besohet se planeti i ri është katër herë më i madh se Jupiteri dhe orbita e tij është afërsisht 375 herë më e madhe se e Plutonit, transmeton Ikub.
Sipas portalit Gizmodo, Tyche ka një temperaturë prej -73 gradë C/-99.4 gradë F, krahasuar me asteroidet rreth tij, të cilët kanë një temperaturë afër zeros absolute.
Prova e ekzistencës se planetit të ri është marrë nga NASA nëpërmjet teleskopit hapësinor Wise, por informatat nuk janë analizuar ende në tërësi. Profesori Matese deklaroi për The Independent se Bashkimi Astronomik Ndërkombëtar (IAU) do të vendosë nëse planeti i ri do të bëjë pjesë në sistemin tonë Diellor.
Të dhënat e para për Tyche do të bëhen publike në prill.
